’n Dieetkundige is ’n gekwalifiseerde gesondheidsorgkundige wat by die Raad vir Gesondheidsberoepe in Suid-Afrika (RGBSA) geregistreer is, en is daaraan toegewy om die gesondheid en welstand van individue, gemeenskappe en bevolkings te verbeter. Dieetkundiges is in die besonder opgelei om oor ’n wye reeks voedingsverwante gebiede te praktiseer.  Hulle gebruik hulle wetenskaplike kennis van voedsel en voeding om siektes te voorkom en te behandel, mediese toestande deur verpersoonlikte diëte te bestuur, en gesonde eetgewoontes deur opvoeding en voorligting te bevorder. 

Dieetkundiges speel ook ’n sleutelrol in openbare gesondheid, voedselbeleid en gemeenskapsontwikkeling, en is noodsaaklike lede van multidissiplinêre gesondheidsorgspanne.  Daarbenewens is hulle in voedseldiensbestuur opgelei, en verseker die veilige, effektiewe en kostedoeltreffende lewering van voedsame maaltye in hospitale, skole en ander instellings.