Die PCDDP beskik oor gekwalifiseerde professionele personeel en ’n moderne, AAALAC-geakkrediteerde en OESO-GLP-voldoenende Vivarium wat toegerus is met omgewingsbeheer- en datavasleggingstelsels vir die uitvoering van prekliniese studies. Die primêre omgewings- en fasiliteitsbeheer word bestuur vanuit ’n interne aanlegkamer, waar individuele kamers van die HVAC-stelsel (verhitting, ventilasie en lugversorging) geïsoleer kan word. Beligting in die fasiliteit kan bestuur word volgens ligintensiteit en fotoperiode. Alle prosedurekamers is toegerus met infrarooiligbronne om na-uurse aktiwiteite te fasiliteer. Waar nodig, kan dag- en nagsiklusse omgeruil word. ’n Ligverduisteringstelsel boots die natuurlike oorgang van dag na nag en omgekeerd na. Vir studies met aansteeklike agente soos bakterieë en virusse is daar ook ’n DALRRD-gesertifiseerde BSL3-laboratorium.

Die PCDDP beskik ook oor ’n teelfasiliteit wat toegerus is om knaagdiere — verskeie muis- en rotstamme — onder SPF-toestande te produseer. Die SPF-status van die diere word bevestig deur middel van ’n gesondheidsondersoek- en wagdiereprogram waar die teenwoordigheid of afwesigheid van patogene bepaal word volgens ’n FELASA-patogeenlys. Die fasiliteit het gevestigde prosedures om die voortgesette SPF-status van die diere te verseker.

Die fasiliteit en afvalvloei is ontwerp om aan cGMP-vereistes vir die vrystelling van entstofgroepe te voldoen. Die PCDDP Vivarium is gevalideer volgens ’n validasie-meesterplan en in ooreenstemming met GMP in gebruik geneem. ’n Gehaltebestuurstelsel is in plek met prosedures soos uiteengesit in beheerde SOP’s, en alle rekords word geargiveer.

Die bioanalitiese fasiliteit by die PCDDP spesialiseer in die analise van geneesmiddels en geneesmiddelmetaboliete in verskeie biologiese vloeistowwe en weefsels. Die fasiliteit is toegerus met ’n Sciex 4000 QTRAP tandem-massaspektrometer wat gekoppel is aan ’n Agilent 1290 UPLC en CTC-HTx PAL-outomonsternemer. Hierdie instrument bied korter looptye, hoë deurset, HILIC- en omgekeerde-fase chromatografie, asook uitstekende sensitiwiteit en selektiwiteit deur middel van die Multiple Reaction Monitoring (MRM)-modus.

Tot dusver beskik die fasiliteit oor verskeie gevalideerde metodes vir die analise van kommersiële geneesmiddels in biologiese vloeistowwe, insluitend anti-diabetiese middels, bloeddrukmedikasie, anti-kankermiddels, antiretrovirale medikasie en kannabidiols. Die validasie voldoen aan riglyne wat deur die FDA en EMA uiteengesit is en behels ’n reeks validasiestappe soos selektiwiteit, oordrag (“carry-over”), lineariteit en sensitiwiteit, presisie en akkuraatheid, matrikseffekte, verdunningsintegriteit en stabiliteit, wat alles binne die omvang van spesifieke statistiese parameters moet val.

Die PCDDP se bioanalitiese fasiliteit beskik oor ’n verskeidenheid monstervoorbereidingsmetodes om optimale ekstraksie van geneesmiddelanaliete uit hul monstermatriks te verseker vir akkurate en betroubare analise.