Die Prekliniese Geneesmiddelontwikkelingsplatform vorm deel van die kommersiële afdeling van die Fakulteit Gesondheidswetenskappe en fokus op akademiese navorsing en dienslewering aan die bedryf. Die PCDDP-navorsing maak gebruik van diermodelle vir prekliniese geneesmiddelnavorsing om die farmakokinetika, veiligheid en doeltreffendheid van toetsitems te bepaal. Ons beskik oor ’n multidissiplinêre navorsingspan met kundigheid in biochemie, farmakologie, toksikologie, analitiese chemie, veeartsenykundige wetenskappe en laboratoriumdiertegnologie.

Die PCDDP lei meesters- en doktorale studente op in Farmaseutiese Wetenskappe met projekte wat fokus op prekliniese diermodelle, geneesmiddelmetabolisme en farmakokinetika (DMPK), bio-analise en etnofarmakologie (IKS). Die navorsing word toegepas op ’n verskeidenheid siektegebiede soos MIV, TB, malaria, diabetes, kanker, depressie en gemoedsversteurings.

Die PCDDP werk saam met die bedryf en akademiese instellings soos die South African Nuclear Energy Corporation (NECSA), die CSIR, die Universiteit van Pretoria, die Universiteit van KwaZulu-Natal, die Universiteit van Zimbabwe en die Universiteit van Kaapstad.

Die PCDDP is ’n lid van die International Mouse Phenotyping Consortium (IMPC), waarvan die algemene doel is om insig te ontwikkel in die funksie van elke muriene geen. Dit sal transformerende insigte bied in die genetiese basis van siektes wat die kliniese diagnose en bestuur daarvan sal beïnvloed, met die uiteindelike doel om siektes te voorkom, op te spoor, te diagnoseer en te behandel.