Primêre Sorg Geneesmiddelterapie (PCDT)

Aptekers met ’n BPharm-graad mag Skedule 1- en 2-medisyne sonder ’n voorskrif resepteer. Die PCDT-kursus (Farmakoterapie 1, Farmakoterapie 2 en Toegepaste Farmakoterapie) is daarop gemik om die omvang van aptekers se praktyk uit te brei sodat hulle sekere primêre gesondheidsorgtoestande volgens Standaardbehandelingsriglyne kan diagnoseer en behandel. Ná voltooiing van die PCDT-kursus sal aptekers die aanvullende opleiding by die Suid-Afrikaanse Aptekersraad (SAAR) kan registreer en vir ’n artikel 22(a)15-permit by die Nasionale Departement van Gesondheid (NDoH) kan aansoek doen. Aptekers wat oor ’n geldige permit beskik, mag sekere toestande diagnoseer en behandel (soos uiteengesit in die bylae wat deel van die permit vorm).

Farmakoterapie 1

Die Farmakoterapie 1-kortkursus dek die teoretiese aspekte van pasiëntgeskiedenisneming, pasiëntonderhoude, siftings- en moniteringsdienste, asook die teorie van fisiese pasiëntondersoeke op ’n primêre gesondheidsorgvlak in die apteek. 
Duur: 6 maande

Farmakoterapie 2

Die Farmakoterapie 2-kortkursus fokus op die simptome en behandeling van verskeie siektes en toestande op ’n primêre gesondheidsorgvlak. 
Duur: 6 maande

Toegepaste Farmakoterapie

Die kortkursus in Toegepaste Farmakoterapie fokus op die relevante en toelaatbare fisiese pasiëntondersoeke, diagnoses en behandeling van toestande op ’n primêre gesondheidsorgvlak.
Duur: 12 maande

Kwaliteitsversekering in die Farmaseutiese Vervaardigingsbedryf

Hierdie kortkursus is daarop gemik om personeel wat in die farmaseutiese vervaardigingsbedryf werk, toe te rus met die basiese kennis en beginsels wat in die bedryf vereis word, asook ’n begrip van hoe om hierdie beginsels toe te pas om voldoening aan die nuutste gehalte- en regulatoriese standaarde te verseker.  Begrippe soos kwaliteitsversekeringsbeginsels, Goeie Vervaardigingspraktyke (GVP), vereistes vir monsterneming, analitiese toetsing en stabiliteitstoetsing, asook die beginsels van gehalterisikobestuur (QRM), word in hierdie kursus behandel.
 

Duur: 3 maande

Grondbeginsels van Antibiotikabestuur

Die doel van hierdie kursus is om deelnemers toe te rus met die noodsaaklike kennis en kliniese vaardighede wat benodig word om as ’n hospitaalsaalapteker te funksioneer. Die kursus bied ’n oorsig van die basiese beginsels van antimikrobiese bestuur en die implementering daarvan, en rus deelnemers toe met die kennis om ’n antibiotikabestuursprogram in hul kliniese omgewing te implementeer.

Duur: 6 maande